الكاتب
فأرجوك... فكر!
لو لقيت حد بيجري في الشارع وهو مش عارف هو بيجري ليه (السبب)، أو بيجري لفين (الوجهة) هتبصله على إنه إيه؟
طب لو كان الحد ده إنت؟
خليني أتكلم معاك شوية... وإن كان كلام مش مترتب أو منمق لكنه طالع من القلب... من شاب زيك في نفس دوامة الحياة.
للأسف الشديد بقيت بحس إن العالم عمال يزيد سرعة وإننا مبنلاقيش وقت نفكر ... من ضغط لضغط لضغط... معندناش رفاهية التفكير... وللأسف كتير مننا معندوش ثقافة التفكير من أصله...
فبنعيش حياتنا كلها واحنا بنجري... ونكتشف متأخر-إلا قلة من اللي ربنا شاء إنه ينور عقلهم وقلبهم-إننا كنا بنجري عشان خاطر الجري... بنجري عشان على بعد خطوة في حاجة محتاجينها، ولما نوصلها نلمح الحاجة اللي على بعد خطوة منها، وما بين خطوة خطوة بنلاقي صعوبات ومتاعب وتحديات تشغلنا أكتر وتسحبنا في دوامة صعب نخرج منها...
فـ نجري وإحنا مش شايفين إلا على بعد خطوة...
ركز معايا...
إنت مش في مسابقة...
ولا مطالب تكون مليونير قبل سن التلاتين وعندك عربية وتتخلص من كرشك وتبقى أجمد وأشهر واحد في جيلك...
النجاح كل فترة معايره بتتغير وتزداد تعقيد وللأسف حاليا بقى معقد جدا...
بقى مرتبط بمعايير خرافية زي الشهرة والثراء العظيم والتأثير وإنك تكون سوبر هيرو متواجد على الأرض...
-يعني متمشيش شخص عادي بيسعى ويحاول وجواه رضى وقناعة لا تتعارض مع الطموح، لكنه مش منتظر كل الإنجازات العظيمة دي عشان يكون راضي ومبسوط؟
-لأ! لازم مترضاش بغير إنك تكون أغنى وأجمل وأشهر وأذكى وأقوى... وأي حاجة حلوة(مجتمعيا) على وزن أفعل...
فتحاول وتحاول في دوامة لو دخلتها بتخسر كتير ولو دخلتها بدون وعي منك بإنت مين ورايح فين وقيمك ومبادئك هتتقطع روحا قبل جسدا...
إنت دلوقت عندك طاقة وشغف...
والمفزع إن لو طاقتك محستش إنك قادر تخرجها وحصل ليها كبت ...
هتكون دمار ليك... وهتتقلب عليك!
فأنا هنا عشاني وعشانك... وطالب منك حاجة واحدة بس...
حاجة واحدة بس مش عاوزك تطلع بغيرها من البوست لإنها خطوة البداية...
عشان خاطري فكر... فكر إنت هنا ليه وعاوز إيه وقيمك وأهدافك...
حتى لو مشوش؟
-حتى لو مشوش فلازم تفكر نفسك إن تشتتك ومحاولاتك لإيجاد معنى حياتك وشكلها وتركيبتها مستقبليا... محاولتك لازم تكون في إطار معين...
إطار نفسي وأخلاقي معين...
يعني لو قلتلك إنك هتعيش في بيت لمدة يوم هتبدأ تعمل إيه؟
-تشوف إحتياجاتك الأساسية من أكل وشرب وممكن تشوف هتنام فين وبس... صح؟
طب هتفضل تدور إزاي تغير مكان الأباجورة وباب الحمام عشان لونه مش عاجبك وتشتري غسالة وتلاجة وبوتجاز؟
شفت حقيقة واحدة بس وهي حقيقي"الوقت" غيرت منظورك وإدراك وبناءا عليه اتصرفت...
وده اللي النبي(عليه الصلاة والسلام)قاله في حديثه العظيم:
عن ابن عمر رضي اللَّه عنهما قَالَ: أَخَذ رسولُ اللَّه ﷺ بِمَنْكِبِي فقال: "كُنْ في الدُّنْيا كأَنَّكَ غريبٌ، أَوْ عَابِرُ سبيلٍ."
إن كلنا بنجري بنجري بكل طاقتنا... وممكن... ممكن منكنش عارفين بنجري ليه... ممكن منكش بنجري في الطريق الصح... ممكن نوصل ونكتشف إننا مكناش عاوزين النهاية دي وإننا جرينا عشان محتاجين نجري... أحسن مـ يتقال علينا المتأخرين أهم...
فأرجوك... فكر!
أي إستفسار يمكنك وضعه في التعليقات.
قيم الموضوع اذا أعجبك.
ملحوظة: يمكن لأعضاء المدونة فقط إرسال تعليق.