الديانة النسخية

الديانة النسخية

تيك تاك توك ..الساعة بقيت 12 ومضطر تنام عشان لازم تصحي بدري لظرف معين وللأسف مش هتعرف تشوف الفيلم المُقرصن الي انت حملته من ايجي بيست ، دخلت سريرك وخلاص هيغلبك النُعاس افتكرت حاجة مهمة ..انت نسيت تطفي نور المطبخ.. وحسب الدستور والقانون السائد في بيتكم كون انك تنام ونور المطبخ مش مطفي ده شيء من المحرمات فبالتالي انت تحاملت علي نفسك وقمت وانت مقريف طفيته ورجعت سريرك تاني عشان تنام وقعدت تحلم بعالم موازي انت قدرت فيه تنشيء معتقد جديد تحلل وتحرم فيه الي انت عاوزه وكان من أوائل الأشياء الي انت حللتها هو ان نور المطبخ يتساب مضيء عادي ، لكن في الوقت الي انت بتتخيل فيه حاجة زي كده في شخص قدر فعلا يصنع معتقد يحط فيه أركان جديدة حسب رغبته هو. 

النسخية أو KOPIMISM ده اسم أطلقه سنة 2010 ايزاك جيرسون طالب الفلسفة في جامعة ستوكهولم علي الفِكر أو الدين الجديد الي عمله وبدأ يدعو ليه زمايله ويحاول ينشره في النطاق الي حواليه ، وأطلق علي الأشخاص الي اتبعوه اسم "النسخيون " ..ما هي زاطت بقا .

بدأ النسخيون بقيادة جيرسون بعمل وقفات احتجاجية بيطالبوا فيها الحكومة السويدية بالاعتراف بدينهم وطلبهم اتقابل بالرفض في البداية بحجة ان دينهم بيفتقر لكتاب مقدس ودار عبادة لشعائرهم ونتيجة لذلك عمل النسخيون دور عبادة صورية يمارسوا فيها الشعائر بتاعتهم "الي مش واضح هي ايه بالظبط اصلا " ، وفي 2011 تمت الموافقة الرسمية علي وجودة ديانة النسخية في السويد .. والله السويد دي طيبة اوي مش بتكسر بخاطر حد خالص الي هو صباح الفل انت بتعبد ايه ..اه جلدة حنفية ..دار العبادة بتاعتك فين ..محل السباكة الي علي اول الشارع..طب تمام خد تصديق علي معتقدك .

الي عمله ايزاك جيرسون ده مكانش دين بالمعني المتعارف عليه يعني هو مدعاش النبوة أو قال انا جاي برسالة من قوة عظمي أو نفي صحة الأديان التانية بالعكس هو حسب كلامه فالإيمان بالنسخية مش معناه الخروج من دينك الأصلي الفكرة كلها انك هتُقر بمبادئها الي بتتمثل في حرية المعتقد وان كل الأديان صح مفيش فيهم حاجة غلط  "مبيزعلش حد منه يعني " 

مبادئ معتقد النسخية ممكن في فئة بتشوف انها مبادئ سامية وهادفة خاصة ان في افكار حديثة من اكتر من شخص مؤثر بتدعو لنفس الكلام ، لكن حابب اقولك ان جيرسون نفسه مكانش مؤمن بالهجص الي بيقوله ده كل ما في الأمر هو انه كان عايز يحقق مبدأ واحد من المبادئ الي حطها في ديانته وهي إلغاء حاجة اسمها حقوق الملكية أو Copyright..وان المعلومات الموجودة علي النت لازم تكون مجانية ومتاحة للكل انه يستخدمها وان من حقك تاخد اي نص مكتوب علي الانترنت وتنسبه لنفسك عادي لأن طالما اتحط علي الانترنت فهو ملكنا كلنا أما بالنسبة لحوار الديانة النسخية فده تمويه يقدر يحقق بيه اهدافه الخاصة بيه هو 

ديانة النسخية اندثرت ومعدتش ليها وجود اوي في يومنا ده لكن في ناس لسه مؤمنة بيها زي فئة من المخترقين وافراد في الديب ويب ، انت نفسك بتحقق مبدأ من مبادئها لما تتعامل مع سرقة حقوق الملكية ان ده شيء عادي او تنكر علي كاتب حقه في الاعتراض علي سرقة منشوره أو تقرأ نسخة مقرصنة pdf من كتاب مش متوفر قانونياً غير ورقي بس ،او تتهم حد بالنصب لأنه عامل قرصات مدفوعة هو مش بيجبرك تدخلها بس انت عاوزها تكون متاحة للجميع بغض النظر عن التكاليف الي هو بيتحملها ومحتاج يغطيها بأي عائد مادي ..فأرجوك هو طلب واحد الي هطلبه منك ..اطفي نور المطبخ وانت ساكت .